ROXAS CITY – Patay ang isa ka mangingisda, samtang isa ang nakasalbar matapos nga nagkulob ang ila ginasakyan nga baroto sa kadagatan nga sakup sang barangay baybay, syudad sang roxas, kagab-i sang Miyerkules.
Ginkilala ang napatay kay Edmund Paco, 40-anyos kag balo, samtang ang nakasalbar nga iya upod ang ginkilala kay Angelo Morerro, 49-anyos nga lunsay mga residente sang Sitio Nipa, Brgy. Culasi, Roxas City.
Sandig sa imbestigasyon sang mga otoridad, naghalin sa ila lugar mga takna alas-12:00 sa udto agud magpangisda sa olotayan, apang alas-8:00 sa gab-i sang papuli na kuntani ang duha ka mga persona, gulpi nalang ginhampak sang mabaskog nga balud nga gintunaan sang pagkaluob sang ila ginasakyan nga baroto.
Natigayon nga makapanghawid si Morrero sa ila sakayan apang ulihi na nadiparahan si paco nga yara sa sulod sang nagkulob nga baroto.
Gintinguhaan pa ini nga salbaron sang pila ka mga residente apang ginbawian ini sang kabuhi sang ginpadangat sa ospital.
Samtang, wala na na-admit sa ospital ang iya upod.
