ROXAS CITY – Patay ang isa ka mangunguma samtang, pilason naman ang duha ka mga kaupod sini sang maigo sang kilat sa Barangay Piña, Maayon, Capiz.
Ginkilala ang biktima kay Regie De Mesa, 36 anyos, samtang lunsay man nga nag-angkon sang paso sa lawas sanday Jovie Estorque, 31-anyos, kag isa pa nila nga kaupod.
Sa interview sang Bombo Radyo kay Jovilyn Demesa, asawa sang biktima, yara sa uyapad ang iya bana kag apat pa ka mga mangunguma sang nagbubo ang mabaskog nga ulan rason nga nagpanilong ang mga ini sa isa ka payag.
Apang, bangud may pagpanaguob kag pagpangilat ang malain nga lakat sang panyempo, ginkakibot na lamang sang mga ini sang hinali nga may naglupok sa ila nahamtangan kag didto nalang nila nakit-an ang tatlo nga lunsay may mga samad matapos maigo sang kilat.
Dugang pa ni Jovilyn, bag-o pa man nga ginpadangat sa ospital ang iya bana nahakos nya pa ini apang maluya na kag nagapalanuka.
Ginakabalak-an naman ni Jovilyn kun paano niya sini padakuon ang tatlo nila ka mga kabataan kay ini ang nagabalatian pa sa tubercolusis kag may mga maintenance pa nga bulong.
