ROXAS CITY – Balik-duty na sa Capiz Rehabilitation Center (CRC) ang 1 sa jailguard samtang wala na ginrenew ang kontrata sang isa pa matapos lunsay nagpositibo sa ginhiwat nga surprise drug test.
Ini ang ginkumpirmar ni PG2 Melanie Yu, Acting Provincial Warden sang CRC sang mainterview sang Bombo Radyo.
Ginpaduty na ang indi na paghingadlan nga jailguard samtang ginahulat pa ang desisyon sang Office of the Governor sa sanction nga igahatag diri.
Suno kay Yu, mabuot nga tawo ang nasambit nga jailguard kag wala sang malain nga tinutuyo sa iya trabaho.
Sa pihak sini, ginasiguro ni Yu nga malimpyo ang CRC kag wala sang kamatuoran ang nakakasulod ang iligal nga droga sa nasambit nga center.
Sa karon ang CRC ang may yara sang 319 ka Persons Deprived of Liberty (PDL) kun sa diin kadam-an diri ang napresu may kaangtanan sa iligal nga droga.
