DAO, CAPIZ – Patay na sang makita ang 16-anyos nga lalaki matapos ini malumos sa suba sa Barangay Bita, Dao, Capiz.
Ang biktima amo si alyas Ace, residente sang nasambit nga barangay.
Sa interview sang Bombo Radyo Roxas kay Police Captain Rian Ampoyos, Hepe sang Dao Municipal Police Station, nakita pa sang pila ka mga residente si Ace nga nagalakat pauli sa ila balay sang Agosto 9, 2025. Apang wala na ini nakapauli sa ila, rason nga gin-report sang tiya sang biktima sa kapulisan ang natabo.
Ginadudahan nga nalumos ang biktima sa Panay River, kabangdanan nga gilayon nga nagresponde ang kapulisan kaupod ang Dao Emergency Response Unit (DERU) kag nagpatigayon sang Search and Retrieval Operation.
Sa operasyon, narekober ang bangkay sang biktima sa bahin sang suba sa nasambit nga barangay.
Ginkumpirma man sang mga otoridad nga wala sang foul play sa kamatayon sang biktima.
Sa karon, yara na sa isa ka purenarya ang bangkay sang biktima.
Panugyan naman sang mga otoridad sa publiko, ilabi na sa mga kabataan, nga maghalong sa palibot sang mga suba kag iban pa nga lugar nga delikado, agud malikawan ang pareho nga insidente.
– With a report from Bombo Jessa Mae Siman De Los Santos
