ROXAS CITY – Nag-angkon sang pilas sa tiyan ang 19 anyos nga lalaki matapos ginaalegar gintiro sang isa ka barangay kagawad sa Barangay Poblacion, Tapaz, Capiz.
Ginkilala ang biktima kay Noemi Dimas, residente sang Barangay Aglupacan, Tapaz, Capiz.
Base sa inisyal nga imbestigasyon sang mga otoridad, gikan sa merkado-publiko ang biktima kaupod ang iya amay kag magapauli na kuntani sakay sa motorsiklo.
Apang ginaalegar nga hinali na lamang ini ginbungguan sang suspek nga si Solomon Galomero, 39 anyos, sang Barangay Agpalali sang nasambit man nga banwa nga ginapahayag isa ka barangay kagawad.
Diri kag ginaalegar nagabot sang iya armas-luthang ang suspek kag gintiro ang biktima nga naigu sa tiyan kag naglapos sa iya nga likod.
Madasig nga nagpalagyo ang suspetsado matapos ang insidente samtang madasig naman nga gindala ang biktima sa ospital agud madapatan sang nagakaigo nga pagbulong.
Padayon sa karon nga gina-imbestigahan sang mga otoridad ang amo nga insidente kun sa diin ginapatihan nga may yara na sang daan nga hiligut-anon ang suspek kag biktima antes pa man ang nasambit nga insidente.
