Indi magnubo sa 19 nga mga indibidwal ang ginpabawian sang kabuhi matapos magtibusok ang military aircraft sa Omdurman, Sudan.
Suno sa pahayag sang military, natabo ang insidente samtang naga-take off ang Antonov aircraft sa Wadi Sayidna air base, antes naghugpa isa ka puluy-an sa distrito sang Karrari sa Omdurman.
Ginkumpirmar man sang military nga kalakip sa mga napatay ang pila ka mga matag-as nga opisyal sang ila hanay, ila nga mga kaupdanan, kag pila ka mga sibilyan apang wala na gintumod kung anu ang rason sa pagtibusok sang nasambit nga eroplano.
Pahayag naman sang Ministry of Health, pagadal-on ang mga bangkay sang biktima sa Nau Hospital sa Omdurman.
Kaangut sini, lima ka mga sibilyan kalakip na ang duha ka mga kabataan nga mag-utod ang ginpadangat sa ospital agud hatagan sang nagakaigo nga pagbulong bangud sa naangkon nga mga pilas.
Matandaan nga sadtong Abril 2023, ang Sudan nagpaidalum sa hugot nga giyera sa tunga sang grupo nga Sudanese kag Rapid Support Forces (RSF), kung sa diin nagresulta sang tuman nga epekto sa mga pumuluyo.
Sa datos sang United Nations kag mga lokal nga awtoridad, masobra 20,000 nga mga indibidwal ang napatay samtang ginapahayag 14-M naman ang nag-evacuate.
