Nagapanawagan si former 1Tahanan Party-list Representative Nathaniel Oducado sang pagtukod sang Department of Disaster Resilience and Emergency Management kasunod sang magnitude 7.8 nga linog nga nag-igo sa nagkalain-lain nga mga lugar sa Mindanao.
Sa interview sang Bombo Radyo kay Oducado, iya ginpahayag nga ang amo nga departamento magatutok lamang sa disaster preparedness, emergency response, recovery kag rehabilitation sa tion sang kalamidad.
Suno kay Oducado, ginasudo sini ang House Bill No. 5764 nga nagatuyo magtukod sang Department of Disaster and Emergency Management agud pagaisahon sa isa ka command structure ang tanan nga disaster-related functions sang gobyerno agud mapadasig ang pagdesisyon, mapabaskog ang koordinasyon, kag mas mangin epektibo ang paghatag sang bulig sa mga apektado.
Dugang pa ni Oducado, padayon man ini kag ang iya volunteer network sa pag-coordinate sa mga local officials, humanitarian organizations kag relief partners agud mahibaluan ang mga nagakinahanglan sang bulig kag mapadasig ang paghatag sang assistance sa mga pamilya nga naapektado sang linog.
