ROXAS CITY – Dakop ang duha ka mga drug personalities sa ginpatigayon nga drug buybust operation sang Provincial Drug Enforcement Unit (PDEU) sa Barangay Bolo, Roxas City.
Ginkilala ang mga suspek nga sanday Francis Villaranda 26-anyos sang Barangay Punta Tabuc, Roxas City kag John Kelly Depiedra 18-anyos sang Barangay Bolo, Roxas City.
Suno kay PDEU team leader Police Lt. Colonel Julius Balano, madugay na nila nga ginpaidalom sa monitoring ang suspek nga si Villaranda apang nadakpan ini matapos nga nagakuha sang suplay sang droga kay Depiedra sang nagpatigayon sang operasyon ang mga kapulisan.
Hugot naman ginpanginwala sang mga suspek nga nagaduso sila sang ilegal na droga.
Samtang, narekober sa mga suspek ang apat ka sachets sang ginapatihan nga shabu, P1,000 nga marked money, tatlo ka unit sang cellphone kag mga drug paraphernalia.
Nagapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002 ang mga arestado.
