Napasakaan na sang panumbungon ang isa ka empleyado sang munisipyo kag electrician nga nakuhaan sang illegal nga armas-luthang sa Barangay Poblacion Norte, Ivisan, Capiz.
Kaso nga paglapas sa R.A 10591 ukon “Comprehensive Law on Firearms and Ammunitions Regulation Act” kag pagbayolar sang Comelec Gun ban ang pagaatubangon sang mga nasambit nga mga persona.
Nahibaluan nga nakuha sa paghinakop sa mga suspetsado ang isa ka unit sang caliber 45 pistol,duwa ka magazine kag 5 ka mga bala sini.
Matandaan ang wala na ginhingadlan nga mga persona ang lunsay mga residente sa nasambit nga banwa
Samtang, wala naman sang ginpakita nga dokumento ang mga suspek angut sa narekober sang mga kapulisan. Natigayon nga madakpan ang mga suspetsado pinaagi sa gintingub nga pwersa sang mga katapo sang Capiz Provincial Intellegence Unit kag Ivisan Municipal Police Station.
Sa karon, nagapabilin ang mga ini sa kustodiya sang Ivisan MPS para sa nagakaigo nga disposisyon.
