ROXAS CITY – Nagkaladakpan ang duwa ka mga truck nga may karga sang balas sang katapo sang kapulisan sa banwa sang Dumalag sa pihak sang ginpapanaog nga suspension order ni Governor Fredenil “Oto” Castro kun sa diin ginpauntat ang tanan nga quarry operation sa probinsya sang Capiz.
Sa interview sang Bombo Radyo kay PSMS Marlon Sonza, Human Rights PNCO sang Dumalag PNP, ginsiling sini samtang nagapatigayon sila sang checkpoint sa public market sang Dumalag sang ila nakit-an kag ginpauntat ang nagabiyahe nga mga truck kun sa diin sa ila pagpangusisa, didto nahibaluan nga may karga ini nga balas.
Suno kay Sonza, ginapanag-iyahan ni Rodelo Floro ang duwa ka mga truck nga gikan sa Barangay Duran kag Mariit kag padulong kuntani sa banwa sang Ivisan kag Mambusao.
Ginpahayag nga apisar nagpanghatag na sila sang kopya sang executive order nga ginpapanaog sang gobernador, madamo sa gihapon ang wala naga-untat sa quarry operation kag ginahulat lamang sang mga ini ang kaaganhon antes magbiyahe agud makalusot sa kapulisan.
Ginturn-over naman ini sa CaPENRO nga amu ang natungdan kag ginpatawag ang apat ka mga persona nga sakay sang duwa ka truck agud maghatag sang ila eksplenasyon.
Dugang pa ni Sonza, nagpadulong na si Gov. Castro sa ila edipisyo kag ginpahanumdom sa ila ang iya executive order gani wala sila gauntat suno diri sa pagronda sang ila patrol kag pagpahamtang sang checkpoints agud magbantay.
Ginapalab-ot sini sa quarry operators nga untaton danay ang pagkuha sang balas bilang pagsunod sa executive order, samtang sa pumuluyo indi magkakulba magsugid sa ila nga mga kapulisan kun may nahibaluan nga wala naga-untat quarry bangud gilayon man sila nga magahatag sang bulig kag aksyon.
