Nagrekord sang duha ka kaso sang monkeypox ang Zimbabwe.
Ini ang ginkumpirmar sang ila health ministry pero wala namensyunar kun ano nga sahi sang variant ang mga ini.
Ang una nga kaso ginapahayag nga nakita sa isa ka 11-anyos nga bata nga lalaki nga nakitaan sang sintomas matapos ang pagbiyahe sini sa South Africa.
Samtang ang ikaduha nga kaso naman ang halin sa 24-anyos nga lalaki nga nagmasakit matapos ang pagbiyahe sini sa Tanzania.
Sa karon, nagapamayad na ang mga pasyente kag nagahiwat na sang contact tracing sa mga naka-close contact sang duha.
Matandaan nga sang Agosto, gin-deklarar sang World Health Organization nga isa ka global public health emergency ang mpox bangud sa paglobo sang kaso sini sa Democratic Republic of Congo kag mga kaiping nga pungsod sa African countries.
