Ginbuyagyag sang self-confessed former aide kag bagman nga si Ramil Madriaga nga ang kontrobersyal nga P125 million confidential funds sang Office of the Vice President (OVP) sang 2022 ang naubos sa sulod lang 24 oras, baliskad sa nauna nga report nga naubos ini sa sulod sang 11 ka adlaw.
Sa hearing sang House Committee on Justice may kaangtanan sa impeachment proceedings batok kay Vice President Sara Duterte kahapon nga adlaw, direkta nga gintumod ni Madriaga sa iya sworn statement nga personal niya nga gindul-ong ang dalagko nga kantidad sang kwarta sa pila ka mga indibidwal kag ginaalegar lakip si Ombudsman Samuel Martires.
Ginpanindugan man sang testigo nga ang nasambit nga mga tikang ang iya ginhimo base sa direkta nga mando nanday former President Rodrigo Roa Duterte kag VP Sara.
Hugot naman nga ginpanginwala ni Madriaga ang report nga naglawig sang 11 ka adlaw antes maubos ang pondo, base sa report nga ginpagwa sa media kag obserbasyon sang Commission on Audit (COA).
