Roxas City – Duha sa tatlo ka ginaalegar suspek nadakpan nga nagpanghold-up sa Barangay Dayao, Roxas City.
Ginkilala ang mga suspek nga sanday Carlo Valencia kag Dennis Cosca lunsay 18-anyos sang Barangay Baybay sining siyudad.
Base sa inisyal nga imbestigasyon sang Roxas City PNP nga nagparekord sa pulisya si Melva Berbaño 20-anyos kag isa ka sales assistant sang nasambit man nga barangay.
Suno sa biktima nga pauli na kuntani ini sang gintambang sang tatlo ka mga ginaalegar nga suspek kag nagdeklarar sang hold-up.
Nahibaluan nga nakuha sang mga suspek sa biktima ang kapin P5,000 nga cash, ATM kag iban pa nga personal nga kagamitan.
Ginpahayag pa sang biktima nga nakasuksok sang jacket nga may hood ang mga suspek kag sakay sa tricycle nga nagaduag yellow.
Sa karon, temporaryo nga nakahunong ang mga suspek sa Roxas City PNP.
Sa pihak nga bahin, nagparekord man sa pulisya ang duha ka iloy sang ginaalegar mga suspek sa pagpanghold-up.
Ginkilala ang mga iloy sang duha ka suspek nga sanday Gina Costa 43-anyos kag Julie Valencia 59-anyos sang Barangay Baybay sining siyudad.
Nagapati ang mga iloy sang suspek nga wala sang sala ang ila mga anak bangud yara ini sa ila balay sang natabo ang insidente.
Samtang, padayon naman ang imbestigasyon sang mga kapulisan sa nasambit nga insidente.
