ROXAS CITY – Pila ka adlaw antes ang Holy Week ukon Semana Santa, duha ka mga simbahan ang magkasunod nga ginsulod sang mga kawatan sa probinsiya sang Capiz.
Daku nga palamangkutanon sa kura paroko kag mga parishioners sang San Pedro Calungsod mission station sa Barangay Mianay, Sigma, ang pagpangawat sang wala pa makilala nga suspek sa tabernakulo nga yara sa atubang sang altar.
Ginkatingala ni Monsignor Butch Abalajon sang makita nga medyo nakabukas ang pirtahan sang simbahan, rason nga iya ini ginpalapitan kag gintsekyar.
Apang amo na lamang ang kakibot sang kura paroko sang makita nga ginwasak ang padlock sang pirtahan gamit ang metal cutter.
Gilayon nga gintsekyar ni Msgr. Abalajon ang mga kagamitan sang simbahan kag nadismaya sang mahibaluan nga ginkuha sang makawat ang tabernakulo.
Ginkadismaya naman ni Monsignor Alden Bolivar, parish priest sang St. Theresa Avila mission station sa Barangay Loctugan, Roxas City sang madiskubrehan nga ginsulod man sang kawatan ang amo nga simbahan.
Nagapati si Msgr. Bolivar nga posible nag-agi sa anay entrance sang simbahan ang kawatan kag gintuyo nga buksan ang tabernakulo apang wala ini sang may nakit-an nga pwede kawaton.
Bangud diri, ginguba sang kawatan ang kandado sang donation box kag gintaban ang kwarta nga unod sini magluwas pa sa speaker kag amplifier nga nagabalor sang kapin P16, 000.
