TAPAZ, CAPIZ – Ginapatuman ang 24-oras nga mobile patrol sa mga eskwelahan bilang kabahin sang weekly routine nga ginapatuman para sa seguridad sang tanan sa Tapaz, Capiz.
Sa interview sang Bombo Radyo, ginpahayag ni Police Major Gregg Anthony V. Salbang, Chief of Police sang Tapaz Municipal Police Station, iya ginpahayag nga ginapatuman ini agud masiguro ang seguridad sang mga estudyante, pinaagi sa pagsekyar sa entrance kag exit sang eskwelahan, lakip na sa tion sang pag-umpisa sang klase.
Suno kay Salbang, ginapabakod man sang kapulisan ang pagbantay kon may mga aktibidad kag nagapakig-angot sila sa school authorities bilang kabahin sang ila security preparedness, agud malikawan ang wala ginalauman nga insidente nga nagakatabo sa iban nga lugar.
Pahayag pa niya, prioridad sa pagpatrolya ang eskwelahan nga may madamo nga volume sang estudyante, samtang ginapalig-on man ang koordinasyon sa iban pa nga eskwelahan, ilabi na sa lugar nga ginapahamtang nila ang symposium bilang information drive may kaangtanan sa kahandaan sa tion sang emerhensya.
Sa karon nahibaluan nga padayon ang ila pag-monitor kag pagpatrolya sa mga eskwelahan bilang preventive measures sang kapulisan agud mapabilin ang kalinong sa mga tagsa ka buluthuan.
