Dumarao, Capiz – Padayon nga ginabulong ang 25-anyos nga lalaki sa isa ka ospital sa syudad sang Roxas matapos ginaalegar ginlabo sang iya abyan sa Barangay Bungsuan, Dumarao, Capiz.
Ginkilala ang biktima kay Edmer Fuentes sang nasambit nga lugar.
Base sa imbestigasyon sang Dumarao PNP nga matapos nag-inom ang biktima kag suspek nga si Mefe Cabison, 27-anyos sang nasambit man nga lugar sa balay sang ila abyan kag magapauli na kuntani sang hinali na lamang nag-angkon sang komosyon sa tunga sang biktima kag suspek.
Ginapahayag nga nagpauli ang suspek kag nagkuha sang espading sa diin hinali na lamang ginlabo ang biktima rason nga nag-angkon sang pilas sa ulo, abaga kag likod si Fuentes kag madasig nga gindala sa ospital.
Boluntaryo naman nga nagsungka ang suspek matapos ang insidente.
Sa karon, nakahunong na sa karsel sang Dumarao PNP ang suspek.
