ROXAS CITY – Arestado ang isa ka persona sa ginkasa nga drug buybust operation sa gintingob nga pwersa sang Provincial Drug Enforcement Unit (PDEU), Cuartero, Dumarao, kag Dao PNP sa Barangay Magtanop banwa sang Dao.
Ginkilala ang arestado kay Fernando Eribal, 39- anyos kag residente sang Carmelite, Brgy. Lawaan, Roxas City, Capiz.
Sa interview sang Bombo Radyo kay Plt. Jobert Delos Reyes, Hepe sang Dao MPS, iya ginpahayag nga natigayon ang operasyon sa bulig sang confidential informant kag sa ila man koordinasyon sa nasambit nga ahensya kag iban pa nga katapo sang kapulisan sang Cuartero kag Dumarao.
Nakuha sa posesyon sang suspetsado ang 4 sachets sang suspected shabu, cellphone, wallet, kag P1,500 buybust money.
Suno kay Delos Reyes, 1 ka bulan na ang ila pagmonitor kay Eribal kag subong lang nga adlaw nangin madinalag-on ini nga nadakpan.
Sa pihak nga bahin, ginsiling ni Kapitan Rene Palomo, Punong Barangay sang Barangay Magtanop, kag isa man sa testigo, indi niya kilala ang nasambit nga suspetsado kag natabuan lamang nga sa ila barangay ini nadakpan.
Gintuad pa ni Kapitan nga kada bulan siya nagasumiter sang report sa kapulisan kag malimpyo na ang ila barangay sa droga bangud nagbag- o na ang mga drug surrenderees sa ila barangay sang nakaligad nga tuig.
Magapangatubang sa panumbungon nga paglapas sa RA 9165 ukon “Comprehensive Dangerous Drugs Act of 2002” ang nasambit nga persona.
Sa karon, yara na sa kustodiya sang Dao MPS ang suspetsado para sa nagakaigo nga disposisyon.
