ROXAS CITY – Patay ang tatlo ka mga menor de edad matapos mabungguan sang isa ka truck ang ginasakyan nga motorsiklo sa National Highway sang Brgy. Poblacion Ilaya, banwa sang Dumarao takna alas 2:15 kaina sang kaaganhon.
Ang tatlo ka mga biktima ang nagapang-edaron sang 12-anyos tubtob 13-anyos nga lunsay mga residente sang Barangay Janguslob, sang nasambit nga banwa.
Samtang, ginkilala naman ang driver sang Isuzu truck kay Jeonec Osoya, 33-anyos nga residente sang Bago City, Negros Occidental.
Sandig sa impormasyon nga nakuha sang Bombo Radyo sa Dumarao Municipal Police Station, ginapahayag nga nagasundanay ang Bajaj nga motorsiklo nga ginasakyan sang tatlo ka menor de edad kag ang salakyan nga ginamaneho ni Osoya.
Apang, hinali nalang nagliko pawala ang mga biktima rason nga nabungguan ini sang nasambit nga salakyan.
Ginpahayag nga ginyudyud pa sang salakyan ang mga biktima kabangdanan nga nag-angkon ang mga ini sang patal nga kapilasan sa ulo.
Mahibaluan nga naghalin sa slaughter house ang mga biktima samtang ginapahayag nga madasig ang pagpadalagan sang driver sang salakyan sang natabo ang aksidente.
Gilayon naman nga ginpadangat sang mga responders sa magkatuhay nga ospital ang mga biktima apang lunsay ang mga ini nga ginbawian sang kabuhi.
Sa karun, yara sa kustodiya sang Dumarao PNP si Osoya kag ang duwa ka salakyan nga lakip sa nasambit nga insidente para sa nagakaigo nga disposisyon samtang nagapadayon pa ang imbestigasyon.
