ROXAS CITY – Dakop ang tatlo ka mga persona sa ginkasa nga drug buybust operation sang Provincial Drug Enforcement Agency (PDEA) Capiz sa Barangay VII sini nga syudad.
Ginkilala ang mga gin-aresto nga sanday Buenvenido Genoves (target), 43- anyos, kag residente sang Brgy. Banica, Roxas City, Manuelyn Alcazaren, 24- anyos, kag residente sang Barangay Bolo, Roxas city, kag Ranil Delos Santos, 35- anyos, residente sang Poblacion banwa sang Pilar.
Mahibaluan si Genoves ang may kaso nga frustrated homicide sang nakaligad nga tuig kun sa diin naulamid ini sa pagpangluthang sa isa ka tricycle driver.
Nakuha sa posesyon sang mga suspetsado ang 9 sachets sang suspected shabu kag P500 buybust money.
Mas o menus 15,000 gramo ang kabug-aton sang nakuha nga suspected shabu kag ginabulubanta P105,000 ang stree value sini.
Magapangatubang sang panumbungon nga paglapas sa RA 9165 ukon “Comprehensive Dangerous Drugs Act of 2002” ang nasambit nga mga persona.
Sa karon, yara na ang mga ini sa kustodiya sang Roxas City PNP para sa nagakaigo nga disposisyon.
