ROXAS CITY – Wala makasalbar ang tatlo tanan ka puluy-an, matapos madasig ini nga ginlamon sang kalayo takna 8:20 subong nga aga sa Sitio Gaba, Barangay Banica, Roxas City.
Ginkilala ang tag-iya sang mga puluy-an nga sanday Rhona Rull, Rolando Rull Sr., kag Angelica Rull Dela Cruz lunsay mga maghimata.
Sa interview sang Bombo Radyo kay tatay Rolando, isa sa mga nasunugan ginpahayag sini nga wala sang tawo sa ila puluy-an sang nagluntad ang sunog bangud yara ini nagapanghawan sa higad sang dalan.
Suno kay tatay Rolando, nga pag-abot niya sa ila puluy-an madamo na sang tawo kag nagadaba-daba na ang kalayo.
Ginpahayag pa sini nga naulamid sa sunog ang iya kwarta nga kapin P9,000 nga kun tani dako nga mabulig sa ila nga magpamilya.
Gilayon man ini nga girespondihan sang 7 ka firetruck agud kun tani salbaron ang nasambit nga mga puluy-an.
Mahibalaun nga human sa light materials ang mga puluy-an rason nga madasig ini ginlamon sang kalayo kag dugangan pa nga mabaskog ang hangin sa lugar.
Maswerte nga wala sang may napilasan sa nagluntad nga sunog.
Kag sa karun, padayon pa ang imbestigasyon sang katapo sang bombero agud hibaluon kung anu ang gintunaan kag pila ang ginbilin nga halit sang nasambit nga insidente.
