ROXAS CITY – Patay ang 32-anyos nga mister matapos nga ginbuno sang iya ugangan sa Barangay Cabangahan, banwa sang Panitan takna 6:30, kagab-i.
Ginkilala ang biktima kay Allen Ruel Abon, samtang ang suspek ang ginkilala kay Jose Estopia Amaba, 63-anyos, lunsay residente sang nasambit nga barangay.
Sandig sa imbestigasyon sang Panitan MPS, samtang nagapanghugas sang pinggan si Amaba, may nagluntad nga kinagamo sa guwa sang iya puluy-an nga ginakalakipan sang biktima kag sang bata sini nga si Junie Amaba, 42-anyos, residente sang nasambit nga lugar.
Ginsaway pa ni Amaba ang iya bata kag umagad agud mag-untat apang wala ang mga ini nagpati kag ginhaboy pa sang baso si Junie.
Ginapahayag nga may yara sang sukbit nga matalum nga hinaniban si Abon kag naghana nga lab-on si Junie apang ginpunggan ini sang suspek.
Nakuha ni Amaba ang hinaniban kag ginbuno sa nawala nga dughan ang biktima.Ginpadangat pa sa Bailan District Hospital ang biktima apang gindeklarar nga dead on arrival sang doktor.
Boluntaryo naman nga nagsungka sa Punong Barangay ang suspek kag gilayon nga ginturn-over sa mga kapulisan.
Nakahunong na sa karsel sang Panitan MPS si Amaba samtang, nagapadayon ang imbestigasyon sa nasambit nga insidente.Sa karon, yara na sa isa ka punerarya ang bangkay ni Abon.
