ROXAS CITY –Nagnegatibo sa Real-Time Polymerase Chain Reaction (RT-PCR) test ang 36 ka mga Overseas Filipino Worker (OFW) repatriates nga nagpauli sa probinsiya sang Capiz makaligad nga na-stranded sa Metro Manila.
Sa pagpakig-angut sang Bombo Radyo News team sa Provincial Disaster Risk Reduction and Management Office (PDRRMO) gilayon nga ginpaidalum sa Real-time Polymerase Chain Reaction (RT-PCR) test ang nasambit nga mga OFW repatriates kun sa diin nagnegatibo man ang mga ini.
Matapos nga nagnegatibo ang mga ini sa rapid test, gilayon nga gindala ang nasambit nga mga OFW repatriates sa tagsa ka mga Municipal Quarantine Facility agud magpaidalum sa 14-day facility quarantine.
Sandig sa datos sang PDRRMO, sa 36 ka mga OFW repatriates, 8 ang taga Roxas City, 7 ang taga banwa sang Panay, 2 ang taga banwa sang President Roxas, 2 man ang taga banwa sang Maayon, 3 ang taga banwa sang Pilar kag 1 ang taga banwa sang Panitan.
Samtang sa segundo distrito, tig duha ang banwa sang Dumarao kag Ivisan, 3 ang sa banwa sang Sapian, kag tig 1 ang banwa sang Cuartero, Dao, Jamindan, Sigma, kag Tapaz.
