ROXAS CITY – Ginaselebrar subong sang Phipilippine Coconut Authority (PCA) ang ika-36th National Coconut Week nga ginsuguran sang caravan diri sa syudad kahapon nga adlaw.
Matapos sini, ginhiwat ang iban pa nga programa sa isa ka dako nga mall sa Lawaan, Roxas City kag ginsuguran ang Coconut Bazaar Trade Fair 2022.
Gintambungan ini ni PCA Regional Director Dr. Neil Melencion, Vice Governor James Magbanua bilang representante ni Gov. Fredenil Castro, kag City Councilor Koks Chu nga amu ang Chairman sang Committee on Agriculture and Fisheries.
Sa interview sang Bombo Radyo kay Dr. Neil Melencion, Regional Director sang PCA, iya ginpahayag nga kulang ang suporta sang gobyerno para sa mga coconut farmers rason nga ginpatigayon ang programa sa probinsya sang Capiz nga ginakabig niya isa sa probinsya sa rehiyon VI nga madamo sang tanom nga lubi.
Dugang pa sang Direktor, tinutuyo sang nasambit nga trade fair nga mapromote ang mga produkto gikan sa lubi kag ang mga panibag-o nga produkto nga ginhimo sang farmers.
Kaangut diri, ginlunsyar ang Coconut Farmers and Industry Development Plan (CFDIP) kun sa diin makabulig sa mga rehistrado nga coconut farmers indi lang pinansyal kundi amu man sang technical assistance, manghatag abono, kag training agud mapa-uswag pa ang coconut farming kag production diri sa probinsya, magahimo man sang bag-o nga mga produkto gikan sa lubi.
Magadugay naman ang Coconut Bazaar Trade Fair 2022 sang kapin tatlo ka adlaw kag magatakop sa Huwebes, Setyembre 1.
