ROXAS CITY – Pilas sa magkatuhay nga parte sang lawas ang naangkon sang 4 ka mga indibidwal, matapos maaksidente sa Barangay Sto. Niño, Dumalag, Capiz.
Ginkilala ang mga nagkalapilasan nga sanday alyas “Ino”, 56-anyos, driver Kawasaki Bajaj nga motorsiklo kag sakay sini nga sanday alyas “Ian” 23-anyos kag alyas “Tonton”, 36-anyos lunsay mga residente sang Masbate.
Samtang ang driver naman sang Suzuki Smash nga motorsiklo ang ginkilala kay alyas “Chad” yara sa legal nga pang-edaron kag residente sang syudad sang Roxas.
Sa impormasyon nga nakuha sang Bombo Radyo nagikan sa Dumalag Municipal Police Station, ginapahayag samtang ginasubay sang duha ka motorsiklo ang dalan nagikan sa banwa sang Cuartero kag padulong kun tani sa nasambit nga lugar hinali na lamang nga nagliko sa wala nga direksyon ang driver sang Kawasaki Bajaj rason nga aksidente nga nabungguan ang Suzuki Smash.
Bangud sa impact, nag-angkon sang pilas sa magkatuhay nga parte sang lawas ang mga ini nga gilayon naman ginpadangat sa magkatuhay nga ospital para sa nagakaigo nga pagbulong.
