ROXAS CITY – Pilason ang apat ka mga indibidwal sa karambola sang duha ka trak kag isa ka van sa Poblacion, Bito-on Ilaya, Cuartero, Capiz.
Ginkilala ang napilasan nga mga biktima nga sanday Willey Imburnal sang Pangasinan, driver sang van, kag mga pasahero sini nga sanday Herson Altre sang Marikina City, Ruvierick Escobar sang Magsaysay, Quezon Province kag Angel Cecista sang Malinao, Albay.
Base sa inisyal nga imbestigasyon, nag-untat ang trak nga yara sa unahan sang van nga ginamaneho naman ni Chanie Pinyano sang Altavas, Aklan bangud sa ginahimo nga konstruksiyon sa karsada rason nga nagpreno man si Imburnal.
Apang nadulaan sang preno ang isa pa ka trak nga yara sa likod sang van nga ginamaneho naman ni Cathy Perlas sang Bilao, Sapian.
Bangud diri, nagbunggo ang trak nga ginamaneho ni Perlas sa van nga ginsundan man sang pagkabunggo sang van sa trak nga ginamaneho ni Pinyano.
Nag-angkon sang menor nga kasamaran sa lawas ang driver sang van kag mga pasahero sini nga gilayon ginpadapatan sang nagakaigo nga pagbulong.
