ROXAS CITY – Nakapalagyo ang 44-anyos nga drug personality sa ginkasa nga drug buy bust operation sang gintingob nga puwersa sang Station Drug Enforcement Unit (SDEU) sang Roxas City PNP kag Philippine Drug Enforcement Agency (PDEA) sa Sitio Pagutok, Barangay Milibili, Roxas City.
Ginkilala ang nasambit nga drug suspek nga si June Lacerna, sang nasambit nga lugar.
Nakuha sa posisyon ni Lacerna ang isa ka plastic sachet sang ginapatihan shabu kag P3,000 nga marked money.
Suno kay Police Master Sergeant Ramil Arcangeles, tagpamaba sang Roxas City PNP nga madugay na nila nga gina-monitor si Laserna bangud sa ginpalab-ot nga reklamo sang mga pumuluyo sa nasambit nga lugar nga nabalaka sa pagguha-sulod sang mga parokyano sa ila lugar.
Ginpahayag ni Arcangeles nga posible nga nakapalagyo si Laserna bangud namutikan sini nga katapo sang kapulisan ang poseur buyer.
Sa pihak nga nakapalagyo ang nasambit nga drug personality pasakaan sa gihapon ini sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
Samtang suno kay Punong Barangay Anabel Roxas sang Barangay Milibili, Roxas City nga naaresto na sadto ang amo nga drug suspek bangud man sa amo nga kaso apang ini ang ginpahilway.
