ROXAS CITY – Ginpaidalum sa surprise drug test ang 49 tanan ka personnel sang Capiz Rehabilitation Center (CRC).
Ini ang ginkumpirmar ni Provincial Warden Arjona Yngcong, sang mainterview sang Bombo Radyo.
Suno diri, tinutuyo sang surprise drug test nga masiguro nga ang mga personnel sang CRC ang malimpyo kag negatibo sa paggamit sang iligal nga druga kag mahatagan sang kasanagan ang isyu sa pasilidad may kaangtanan sa iligal nga druga.
Ang nasambit nga test, ang ginpangunahan sang mga katapo sang Roxas Memorial Provincial Hospital sa idalum sang direktiba ni Governor Fredenil Castro.
Pahayag ni Yngcong, wala sila sang dapat nga ikahadlok bangud wala man sila nagaduso kag naggamit sang iligal nga druga.
Matandaan, sang Nobyembre 2022 boluntaryo nga nagpaidalum sa drug test ang mga empleyado sang CRC bangud luyag ni Yngcong nga mangin malimpyo ang iya pagdumala.
Aminado naman ini, nga madamo sang huring-huring nga nagalapta nga may mga jail guards ang ginaalegar nagapalusot sang iligal nga druga apang ginasiguro sini nga indi na maliwat ang kaangay nga hitabo sang nanliligad nga tuig kun sa diin ang 1 ka jail guard ang nakuhaan sang iligal nga druga.
