ROXAS CITY – Iga-paidalom sa real-time polymerase chain reaction (RT-PCR) test ang lima ka mga contract workers gikan sa Mexico, Pampanga nga nakalusot sa Roxas City nga wala sang koordinasyon sa mga otoridad.
Matapos nagreklamo ang pila ka concerned citizen malapit sa gin-upahan nga boarding house sang amo nga indibidwal, ginpadulungan ang amo nga indibidwal kag gindala sa quarantine facility sang Barangay Punta Tabuc.
Nahibaluan nga ang nasambit nga mga persona ang nagatrabaho bilang manugtakod sang signages sa isa ka dako nga mall sa Roxas Avenue.
Mahibaluan nga nag-abot sa siyudad ang nasambit nga mga persona sadtong Agosto 1.
Nag-agi ang mga ini sa Batangas Port kag nag-abot sa Caticlan Port kag diri sila nagsakay sa isa ka pribado nga salakyan padulong sa siyudad.
Sang gin-usisa ang nasambit nga mga persona, may ginpakita man sila nga mga dokumento kalakip na ang resulta sang rapid test, RT-PCRtest kag medical certificate nga nagapamatuod nga hilway sila sa virus.
Apang ginapahayag nga gin-peke lamang ang amo nga mga dokumento agud makalusot sila sa Roxas City.
