Nakabatyag ang 51 milyon nga Pilipino sang hanuot nga food insecurity humalin 2021 tubtob 2023, suno sa isa ka pagtuon nagikan sa United Nations.
Ginkabig nga pinakamalala ang sitwasyon sa Pilipinas sa Southeast Asia.
Suno sa UN, ang isa ka indibidwal ang ginakonsidera nga food insecure kun ini ang wala sang regular nga access sa malimpyo kag masustansya nga pagkaon para sa normal nga pagdako, pag-umwad kag para magka-aktibo nga pagpangabuhi.
Base sa pinakabag-o nga report sang UN sa State of Food Security and Nutrition in the World, ang Pilipinas ang may pinakamataas nga numero sang mga indibidwal nga nakabatyag sang hanuot nga food insecure sa rehiyon nga ginakabuuan sang halos katunga sang 115.8 milyon ka indibidwal nga napangatubang sa nasambit nga pagtilaw sa adlaw-adlaw nga pagpangabuhi.
Gapangaduha naman ang Myanmar sa rehiyon nga may mataas nga numero sang indibdiwal nga may food insecure nga yara sa 17.4 million, ginsundan man ini sang Indonesia kag Vietnam.
Ikatatlo naman sa bilog nga rehiyon ang Pilipinas pag-abot sa rate sang moderate ukon severe food insecurity sa kabug-usan nga populasyon nga yara sa 44.1%, ginsundan sini ang Timor-Leste nga yara sa 53.7% kag Cambodia nga yara sa 50.5%.
Samtang, sa kapareho nga period, yara sa 6.9 milyon ka Pilipino ukon 5.9% sang kabug-usan nga populasyon ang kulang sa nutrisyon.
