Patay ang 59-anyos nga panday matapos ginbuno sang iya kainuman sa Hollywood North, Brgy. Lamo, Dupax del Norte sang Marso 31.
Base sa report sang Philippine National Police sa nasambit nga banwa, naga-inom-inom ang biktima kaupod ang 31-anyos nga suspek sang gulpi lang ini nga naglakat. Pagbalik sini, ginpahayag nga may bitbit ini nga kutsilyo kag gilayon nga ginbuno sang makatatlo ka beses sa likod ang biktima.
Sa pihak sang mga pilas nga iya naangkon, ginpahayag nga nakadalagan pa ang biktima sang ginabanta 100 meters palayo sa suspek antes natumba.
Gilayon nga gindala sa ospital ang biktima apang gindeklara nga dead on arrival bangud sa kadalumon sang igo sang pagkabuno.
Nagaguha sa imbestigasyon nga duha na ka adlaw nga naga-inom ang suspek bangud sa personal nga problema may kaangtanan sa plano sang iya live-in partner nga maglakat padulong sa Middle East agud mag-obra.
Suno sa kapulisan, kontra ang suspek sa nasambit nga plano.
Nagapati ang mga otoridad nga posible nag-init ang suspek sa biktima nga gintunaan sang pagpangbuno.
Sa subong, yara na sa kustodiya sang Philippine National Police sa Dupax del Norte ang suspek kag padayon ang preparasyon agud mapasakaan ini sang kaso.
