ROXAS CITY – Wala sang lamud pamulitika ang anum ka bulan nga suspension nga ginpapanaug sa punong barangay sang Barangay Inzo Arnaldo Village.
Ini ang pag-athag sang Chairman sang Committee on Good Governance sang Sangguniang Panlungsod nga si City Councilor Albert Gregory Potato sa interview sang Bombo Radyo.
Ginpahayag ni Potato nga ila ginba-se ang nangin verdict ukon desisyon sa kun ano ang yara sa record.
Suno sa opisyal nga ginhatagan sang tsansa si Okpora nga madepensahan ang iya bahin apang gin-waive sini ang iya kinamatarung nga magkuha sang abogado.
Wala man nagsumiter sang position papers kalakip ang judicial affidavit sang iya mga witnesses ang nasambit nga barangay kapitan gani tanan nga ebedensiya sang complainant nga nagpasaka sang kaso administratibo batuk kay Okpora ang uncontroverted.
Ginpahayag pa sang opisyal nga may tag tatlo ka bulan nga suspension ang duha ka mga kaso ni Okpora nga ginalakipan sang Grave Misconduct kag Serious Dishonesty.
Nag-ugat ang suspension ni Kapitan Okpora matapos ginkuha sini ang isa ka Locally Stranded Individual (LSI) nga residente sang iya barangay sa Congressman Ramon A. Arnaldo High School (CRAAHS) nga nagaserbi quarantine facility sang Oktubre 2020.
Suno kay Potato nga indi ensakto ang gin-akto ni Okpora bilang isa ka opisyal sang gobyerno bangud ginbalewala sini ang laye.
Nagalaum ang konsehal nga magaserbe nga leksyon ang suspension ni Okpora sa mga public officials nga mangin responsable sa ila ginahimo aksyon.
