ROXAS CITY – Nagalab-ot na sa anum ka mga kabanwahanan ang nakapapasar sang resolusyon angut sa pagdeklara sa mga miyembro sang Communist Party of the Philippines-New People’s Army (CPPA-NPA) nga mga persona non-grata.
Ini ang ginkumpirma ni Capiz Police Provincial Office (CPPO) Provincial Director Police Colonel Julio Gustilo Jr. sang ma-interview sang Bombo Radyo.
Suno kay Gustilo ang anum ka mga kabanwahanan ang ginalakipan sang mga banwa sang Pilar, Pontevedra, Panay, Cuartero, Dao kag Sapian.
Ang epekto sang pagdeklara sang mga kabanwahanan nga persona non-grata sa mga miyembro sang CPPA-NPA amo ang indi sila hilway nga magpadulong sa amo nga lugar, indi makapanukot sang revolutionary taxes, wala sang pagpamahog, kag madamo nga iban pa.// Bangud diri ginakalipay ni Gustilo kun ang tanan nga mga kabanwahanan sa probinsya sang Capiz ang makapapasar sang resolusyon nga nagadeklara nga persona non-grata sa mga komunista nga grupo.
Apang wala naman gina-pressure ni Gustillo ang mga Local Government Unit (LGU’s) nga magpapasar sang nasambit nga resolusyon.
Nagapasalamat si Gustilo sa dako nga supporta nga ginapakita sa mga kabanwahanan sa probinsya sang Capiz sa ila kampanya batuk sa komunista nga grupo.
Sa karon ginaganyat ni Gustilo ang mga miyembro sang komunista nga grupo nga magbalik na sa sabak sang gobyerno bangud may yara sang mga programa nga nakapreparar para sa ila pinaagi sa Enchanced Comprehensive Local Integration Program (E-Clip).
