Dako nga katilingalahan ang gulpi nga pagkadula sang isa ka 7-anyos nga bata nga lalaki sa Barangay Angub, banwa sang Cuartero.
Sa interview sang Bombo Radyo kay PB Genaro Desales, ang kapitan sang nasambit nga barangay takna alas-9:00 sang gab-i sang Agosto 26, nakabaton ini sang tawag natuhoy sa nasambit nga insidente.
Pahayag ni PB Desales, takna alas-5:40 kahapon sang hapon, nadula ang amo nga bata kag naglaong ini nga manulo sang damang kaupod ang mga abyan sini.
Nagkinagual ang mga himata sang bata sang nakapauli na ang mga abyan ini samtang ang amo nga biktima ang wala na nakit-an.
Sa panaysayon ni PB Desales, sang wala pa magdugay nga nag-abot ini sa lugar, gilayon man nga nakita ang amo nga bata nga nagatindog malapit sa ila man sini nga puluy-an.
Natingalahan sang mga pumuluyo sang lugar, sa kadugayon nga pinangita sa amo nga bata sa lugar sang gulpi lang man ini nga nagpakita. Yara sa ginabulubanta nga tatlo ka oras ini nga nadula.
Dugang pa ni PB Desales, ini palang ang kauna-unahan nga nakabalhag ini sang mga kasubong sini nga kaso sa ila barangay.
Bilin sini sa mga pumuluyo ilabi na sa mga kabataan kag mga ginikanan sa ila barangay, sa oras sang tigdululom na itsekyar kag indi pagpabay-an ang ila mga kabataan kay responsibilidad ini nila bilang mga ginikanan.
