ROXAS CITY – Emosyunal ang isa ka iloy kag asawa samtang ginasaysay ang malain nga nadangatan sang iya mag-amay nga napatay matapos makuryente sa wiring sang electric motor sa Barangay Calaan, Panit-an.
Sa exclusive interview sang Bombo Radyo kay Emma Concepcion, ginpahayag sini nga indi pa niya mabaton tobtob sa karon ang pagkamatay sang bana nga si Roger Concepcion 51-anyos kag solterito nga anak nga si John Rey.
Gin-imporma lamang ang ginang sang iya umagad kag ginapakadto sa Bailan District Hospital bangud didto gindala ang iya bana.
Ginkakibot na lamang ini sang nagdiretso sila sa morgue sang ospital kag nakita ang patay na nga bana kag anak.
Suno kay Mrs. Concepcion nga mabudlay para sa iya nga batunon ang natabo, bangud duha gid sa iya mahal sa kabuhi ang nadula.
Wala man napunggan sang ginang nga magpalayag sang iya kalain sang buot, bangud ang anak nga napatay ang nagpursige nga maka-eskwela agud kun makatapos sa pagtuon, makabulig man sa ila pamilya.
Nahibaluan nga duha ka semana pa lamang sang na-instolar ang nasambit nga electric motor nga ila ginakuhaan sang tubig, sa diin katuyuan sang ila pagpahamtang sini agud indi na mabudlayan sa pagkuha sang tubig ang solterito nga anak nga naga-eskwela.
