Nagpahayag sang bug-os nga kahandaan kag dedikasyon ang Bureau of Fire Protection (BFP) sa pagsiguro sang kaluwasan sang mga delegado, partisipante kag pumuluyo samtang ginahiwat sa Pilipinas ang 49th ASEAN Summit and Related Summits.
Ginpakigbahin sang BFP ang iya mga personnel, kagamitan kag operational capabilities agud suportahan ang komprehensibo nga seguridad, kaluwasan kag kahandaan sa emerhensiya sang gobyerno sa tion sang internasyonal nga pagtililipon.
Suno sa BFP, may pinakadaku ini nga pwersa kun ang pagabasehan amu ang kadamuon sang mga kagamitan ukon assets kumpara sa iban nga support agencies nga nagabulig sa summit.
Ginpahayag man ni FCSUPT Wilberto Rico Neil A. Kwan Tiu, Officer-in-Charge sang BFP, nga nagadepende ang kadalag-an sang mission sa mga personnel nga direkta nga nagatuman sang ila mga katungdanan sa field.
Ginpahanumdom man niya ang tanan nga personnel nga indi lamang operational readiness ang ginakinahanglan sa ila deployment, kundi pati ang disiplina, propesyonalismo kag estrikto nga pagsunod sa mga protocol.
Dugang pa, responsibilidad sang tagsa ka miyembro sang BFP nga representaran ang ahensya kag magserbisyo bilang kabahin sang panikasog sang pungsod nga masiguro ang malinong kag luwas nga palibot para sa tanan nga delegado kag partisipante.
Handa man ang ahensya sa pagresponde sa nagkalain-lain nga emerhensya, lakip na ang sunog, medikal nga emerhensya, rescue operations, hazardous materials incidents kag iban pa nga sitwasyon nga nagakinahanglan sang gilayon nga pagresponde.
Ginpasiguro sang BFP nga padayon ini nga handa kag dedikado sa pagserbisyo kag pagproteher sang kabuhi kag propiedad sang mga Pilipino.











