Ginpanindugan sang Bayan Panay ang ila pagkontra sa PUV Modernization Program bangud sa ginapatihan nila nga mabug-at nga epekto sini sa pangabuhian kag kinamatarong sang mga traditional jeepney driver kag operator.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga masakit para sa mga traditional jeepney driver nga padayon nga nagaserbisyo sa publiko kag nagsustener sa transportasyon nga naapektuhan sang amo nga programa.
Suno kay Forro, halin pa sang 2017, padayon ang ila grupo sa pagpangabay kag pagpakig-dialogo sa House of Representative, Senado, Department of Transportation (DOTr) kag Land Transportation Franchising and Regulatory Board (LTFRB) agud ipaabot ang epekto sang modernization program sa pangabuhian sang mga driver kag operator.
Suno kay Forro, duha ka importante nga butang ang ila nakita nga katuyuan sang programa: ang pag-phaseout sang traditional jeepneys kag ang centralized procurement kag pagtukod sang leasing companies nga, suno sa iya, mahimo magresulta sa monopolyo sang dalagko nga kapitalista.
Nagalaum man ang natungdan nga pamatian ang madugay na nila nga panawagan kag indi na paghulaton nga maubos ang mga traditional jeepney.
