Ginpabaskog liwat sang administrasyon ni President Ferdinand Marcos Jr. ang kampanya batok sa ilegal nga droga matapos ginpresentar sang mga otoridad ang una nga resulta sang imbestigasyon sa 521 ka kilo nga droga nga nagabalor sang P3.5 bilyon nga nasabat sa Laos samtang ginapadala pakadto sa Pilipinas.
Sa press briefing sa Malacañang sang nagligad nga Byernes, ginpahayag ni Interior and Local Government Secretary Jonvic Remulla ang pagkakilanlan sang pila ka personalidad nga ginapatihan may kaangtanan sa operasyon sang nasabat nga droga.
Suno kay Remulla, nagabuligay ang Philippine Drug Enforcement Agency (PDEA) kag Philippine National Police (PNP) paagi sa isa ka joint task force agud mapunggan ang pagsulod sang ilegal nga droga sa pungsod.
Ginpagwa man sang Department of the Interior and Local Government (DILG) ang isa ka chart nga nagapakita sang ginapatihan nga kaangtanan sang 11 ka persons of interest, halin sa pagbakal sang pribado nga eroplano tubtob sa ginapatihan nga epekto sa pagpadala sang droga sa Pilipinas.
Samtang, ginpahayag ni PNP Chief Police General Jose Melencio Nartatez Jr. nga yara na sa kustodiya sang kapulisan ang isa sa mga persons of interest, samtang padayon nga ginabantayan ang iban pa.
Apang, suno kay Nartatez, wala pa sang kaso nga ginpasaka ukon mandamiento de arresto batok sa 11 ka persons of interest, gani indi pa sila mahimo nga arestuhon.
