Ginduso ni Capiz First District Board Member Dr. Cesar Yap Jr. ang programa nga “BAD” ukon Battle Against Dengue agud mapabakod ang kampanya kontra dengue sa probinsya sang Capiz.
Sa interview sang Bombo Radyo kay Yap, iya ginpahayag nga sa ika-68 Regular Session sang Sangguniang Panlalawigan, ginpresentar ang nasambit nga inisyatibo nga nagatuyo sa pagpataas sang ihibalo sang publiko kag pagpalig-on sang mga tikang agud malikawan ang pagdamo sang kaso sang dengue.
Paagi sa programa, ginapabaskog ang importansya sang pagtinlo sang palibot, pagkuha sang mga butang nga mahimo pamugaran sang lamok kag pagpatuman sang nagakaigo nga mga pamaagi agud mapunggan ang paglapta sang dengue.
Ginalauman nga paagi sa inisyatibo, mas madugangan ang partisipasyon sang mga komunidad kag mga lokal nga panguluhan sa kampanya kontra dengue, ilabi na sa paglikaw sa mga posible nga pamugaran sang lamok nga nagadala sang balatian.
