Ginpanindugan sang grupo nga Karapatan nga indi dapat mangin balat-sibuyas ang mga opisyal sang gobyerno sa pag-atubang sang mga kritisismo halin sa publiko kag media.
Ini kasunod sang pagpasaka sang kaso ni Rep.Paolo Duterte batok sa pila ka mga katapo sang media.
Sa interview sang Bombo Radyo kay Raoul Manuel, Karapatan National Council Member, iya ginpahayag sang importansya sang pagrespeto sa kinamatarong sang kada isa nga magpahayag sang ila opinyon, maghatag sang kritisismo kag magpamangkot parte sa mga aksyon sang mga opisyal sang gobyerno.
Suno kay Manuel, dapat mangin bukas ang mga opisyal sa mga kritisismo, ilabi na kon may kaangtanan ini sa ila pagserbisyo sa publiko bangud kabahin sang ila responsibilidad ang pagbaton sang mga pamangkot kag pagsabat sa mga isyu nga ginapahayag sang mga pumuluyo.
Pahayag pa sini, ang freedom of expression isa ka kinamatarong sa demokratiko nga pungsod, nga nagahatag kahigayunan sa mga pumuluyo nga makapahayag sang ila mga opinyon nga wala sang nagakaigo nga pagpanghadlok
Nagapati man ang natungdan nga labaw sa tanan nga mga pagpasaka sang kaso, magadaog sa gihapon kun ano ang kamatuoran.
