Pabor si Agriculture Secretary Francisco P. Tiu Laurel Jr. nga ipaidalom sa State of Calamity ang bug-os nga Pilipinas agud mapadasig ang paggamit sang pondo kag ang paghatag sang kinahanglanon nga bulig sa publiko bangud sa nagalala nga epekto sang El Niño phenomenon.
Ini kasunod sang padayon nga pagduso ni Senador Francis “Kiko” Pangilinan sa amo nga tikang, kasunod sang paandam sang Philippine Atmospheric, Geophysical and Astronomical Services Administration ukon PAGASA parte sa posibilidad sang mas tuman nga init nga dulot sang El Niño.
Suno sa report, kinahanglan nga magdesisyon gilayon ang mga awtoridad samtang wala pa nagalala ang epekto sang El Niño sa mga produkto sa agrikultura, pangabuhian sang mga mangunguma kag suplay sang pagkaon.
Ginabulubanta sang Department of Agriculture nga madamo nga mangunguma kag manugpangisda ang mahimo maapektuhan sang sini nga phenomenon, nga mahimo magpamenos sang produksyon sang humay kag iban pa nga mga produkto sa agrikultura.
