Nanawagan si Senate President Sherwin Gatchalian sa mga awtoridad nga siguraduhon ang hilway kag matawhay nga pag-aresto kay Sen. Ronald “Bato” dela Rosa agud malikawan ang posible nga pagbayluhanay sang lupok kag pagkasamad sang mga sibilyan kag operatiba.
Ginpahayag ni Gatchalian nga importante ang kaluwasan sang tanan sa pagpatuman sang layi, kasunod sang pahayag ni Interior Secretary Jonvic Remulla nga posible magresulta sa madugo nga insidente ang pagpwersa sa pag-aresto sa senador.
Suno kay Remulla, nagapakig-angot ang gobyerno agud kumbinsihon si Dela Rosa nga magsurender, samtang nagtanyag man sang P50 million nga pabuya para sa impormasyon nga makabulig sa iya pag-aresto.
Bisan pa sini, ginpabug-atan ni Gatchalian nga dapat panindugan sang gobyerno ang awtoridad sini kag indi makig-negosasyon sa mga armado nga grupo nga wala sang otorisasyon sa pag-angkon sang armas.
Nahibaluan nga may warrant of arrest si Dela Rosa halin sa International Criminal Court may kaangtanan sa ginapahayag nga crimes against humanity sa kampanya kontra droga sang administrasyon ni anay President Rodrigo Duterte.
