Igadeploy sang Sigma Municipal Police Station ang tanan nga mga personnel sang ila talatapan umpisa Oktubre 31 agud masiguro ang malinong kag luwas nga pagsaulog sang tigkalalag sa banwa sang Sigma.
Sa interview sang Bombo Radyo Roxas kay Police Major Narciso V. Sables Jr., Officer-in-Charge sang Sigma Municipal Police Station, ginpahayag sini nga magapahamtang sila sang mga pulis sa tatlo ka sementeryo, stoplight area kag merkado nga nagaserbe bilang temporaryo nga terminal, agud mabantayan ang seguridad kag paghulag sang trapiko.
Magabulig man sa deployment ang Municipal Disaster Risk Reduction and Management Office, Rural Health Unit, POSO kag iban pa nga force multipliers.
Suno kay Sables, hugot nga ginadumili ang pagdala sang armas, matalom nga kagamitan, makahulubog nga ilimnon, playing cards kag pagpatukar sang mabaskog nga musika sa sulod sang mga sementeryo, samtang ginapatuman man ang smoking ban sa pampubliko nga mga lugar.
Magapatuman sang inspeksyon kag roving ang kapulisan, kasunod sang paandam nga indi nila pagkunsintihon ang pagpangawat kag iban pa nga paglapas sa kasuguan sa tion sang Undas.
Nagpanawagan man ang natungdan sa mga pumuluyo nga magkooperar sa kapulisan, magbantay sang ila personal nga mga gamit kag magsunod sa mga ginapatuman nga pagsulundan agud malikawan ang pagpangawat kag iban pa nga insidente. Ginpasalig man sini nga nagahimo ang kapulisan sang nagakaigo nga preparasyon kag seguridad para maprotektahan ang publiko sa pagsaulog sang Undas sa banwa sang Sigma.
