CAPIZ-Ginpatigayon sa Hall of Governors sang Capiz Provincial Capitol, ang pre-screening camp sang Operation Smile Philippines (OSP) agud matumod ang mga pasyente sa Capiz nga may cleft lip kag cleft palate nga kwalipikado para sa libre nga operasyon.
Ang aktibidad ginpatigayon paagi sa pagpakig-angot sang Operation Smile Philippines kag sang Gobyerno Probinsyal sang Capiz, sa idalum sang administrasyon ni Governor Fredenil H. Castro, upod ang Provincial Health Office (PHO) kag Provincial Social Welfare and Development Office (PSWDO). Ginpaathag man ang kahigayunan sa mga lokal nga ahensiya sa probinsya kag sa mga asosasyon sang persons with disabilities (PWDs) agud mahibaluan sang mas madamo nga pumuluyo ang programa.
Pinaagi sa sini nga inisyatibo, ang mga pasyente nga makapasar sa screening kag makakwalipikar sa programa pagadalhon sa Cebu Comprehensive Cleft Care Center of Excellence para sa nagkalain-lain nga serbisyo, lakip ang operasyon, dental care, speech therapy, nutrition services kag psychosocial support. Libre man ang plite, pagkaon, bulong kag puluy-an sang mga benepisyaryo samtang nagapadayon ang ila operasyon.
Ginasuportahan ni Governor Castro ang programa nga nagatuyo sa paghatag sang mas maayo nga kahimtangan sa panglawas kag oportunidad sa mga indibidwal nga may cleft lip kag cleft palate, ilabi na sa mga lamharon nga kabataan. Paagi sa nagakaigo nga pagtambal, ginapaabot nga mapauswag ang ila abilidad sa pagpamulong, kahimtangan sa panglawas kag pagsalig sa kaugalingon.
Nagtambong man sa aktibidad si Provincial Social Welfare and Development Office head Joerine Tan, mga representante sang PSWDO kag PHO, kag si Cliff Japhet McCafe, program manager for patient services sang OSP, upod ang iya mga kaupdanan.
Ang programa nagahatag sang kahigayunan sa mga kwalipikado nga Capisnon nga makabaton sang kinahanglanon nga cleft care nga wala nagapas-an sang bug-at nga galastuhan, agud mabuligan sila nga mag-angkon sang mas maayo nga panglawas kag mas masanag nga palaabuton.
