ROXAS CITY – Magaumpisa ang Roxas City Police Station sang official deployment sa October 29 para sa pagbantay sa pagsaulog sang Undas 2026.
Sa interview sang Bombo Radyo kay Police Lieutenant Colonel Rogelio L Tomagtang Jr., Chief of Police sang Roxas Component City Police Station, iya ginpahayag nga may lima ka pribado kag tatlo ka pampubliko nga sementeryo sa siyudad nga pagabantayan sang kapulisan.
Suno kay Tomagtang duha ka PNP personnel ang natalana nga magabantay sa tagsa ka sementeryo, upod ang mobile patrol kag Integrated Patrol Deployment Plan ukon IPDP”, kun sa diin mahimo man ini nga i-adjust nga naga depende sa kadamuon sang nagabisita sa tagsa ka sementeryo.
Pahayag pa niya, magabulig man ang Quick Response Team ukon “QRT”, sa pagmintinar sang seguridad agud mangin matawhay ang pagsaulog sang Undas.
Dugang pa sa ompormasyon sa lima ka sementeryo nga private kag tatlo naman ang public duha ka PNP personnel ang natalana nga magabantay kun sa diin yara man ang presensya sang mobile patrol, kag Integrated Patrol Deployment Plan “IPDP”, nga handa man i-adjust nga magadependi sa kadamuon sang mga nagabisita sa tagsa ka sementeryo.
Samtang sa walo ka sementeryo magabantay man ang mga personnel sang Roxas City Police Station sa mga tourist spot, establisyimento kag mga lugar nga madamo ang nagabiyahe, lakip na ang mga nagapadulong kag nagapuli matapos magbisita sa ila mga minahal nga napatay.
Sa karon, ginalauman nga mangin matawhay kag malinong ang pagsaulog sang Undas 2026 paagi sa pagpatuman sang nagakaigo nga seguridad sang kapulisan sa nagkalain-lain nga lugar sa Roxas City.
