Nagpatigayon ang Roxas City El Niño Task Force sang Coordination Meeting agud mapabakod ang koordinasyon kag preparasyon sang syudad sa pag-atubang sang posible nga epekto sang El Niño sa mga pumuluyo kag nagkalain-lain nga sektor.
Gintalakay ang mga plano kag estratehiya agud mangin handa ang syudad sa posible nga epekto sang El Niño sa pangabuhian, edukasyon, ikaayong lawas kag iban pa nga importante nga bahin sang kabuhi sang mga pumuluyo.
Lakip sa mga gintalakay ang Detailed Implementation Plan sang tagsa ka response cluster, nga mangin basehan sa pagplano sang mga aktibidad kag estratehiya nga mahimo i-angut sa contingency plan sang syudad.
Gintalakay man ang posible nga epekto sang El Niño sa suplay sang tubig, agrikultura kag pangisdaan, lakip ang mga tikang nga mahimo ipatuman agud maibanan ang risgo sa mga pumuluyo kag maprotektahan ang pangabuhian sang mga mangunguma.
Paagi sa temprano kag komprehensibo nga pagplano, pati na sa pagbinuligay sang nagkalain-lain nga sektor, ginapabakod sang Roxas City Government ang kahandaan sang syudad sa pag-atubang sang posible nga mga epekto sang El Niño.
Katuyuan sini nga masiguro ang mas maayo nga pagresponde kag pagpanalipod sa kaayuhan sang mga pumuluyo kag sa ila mga pangabuhian kun mag-atubang sang mga epekto sang ini nga kahimtangan sang panahon.
