Maga-deploy ang France sang 70,000 ka mga pulis kag gendarmerie sa nagkalainlain nga bahin sang pungsod bilang paghanda sa natalana nga mga protesta sa Sabado, Oktubre 31, kadungan sang selebrasyon sang Halloween.
Suno kay Interior Minister Laurent Nunez, pabaskugon ang seguridad pinaagi sa pagdeploy sang armored vehicles kag water cannons agud malikawan ang kinagamo.
Nag-ugat ang mga protesta sa nagataas nga gasto sa pagpangabuhi sa pungsod nga nagtuga man sang malapnagon nga pagpangawat kag kinagamo sa pila ka mga lugar.
Base sa data sang Interior Ministry, mga 410,000 ka mga tawo ang nagpasakop sa mga demonstrasyon sang nagligad nga Sabado, samtang masobra 2,700 naman ang nadakpan sang nagligad nga semana.
Nagpaandam man si Nunez batok sa paggamit sang Halloween masks bilang balibad agud taguon ang identity samtang nagapatigayon sang kinagamo.
Ginhatagan pagtamod sang tiglikom nga hugot nga atubangon sang mga otoridad ang sin-o man nga magatuga sang kinagamo, lakip na ang mga grupo sa magtimbang nga bahin sang pulitika.
