Ginsiguro sang Barangay Council sang Barangay Bato, banwa sang Panay, Capiz, nga matawhay kag malinong ang palibot sang ila patyo para sa mga pumuluyo nga magaduaw sa ila mga himata nga nagtaliwan subong nga tigkalalag.
Sa interview sang Bombo Radyo kay Barangay Kagawad Lowel Camacho, iya ginpahayag nga matawhay ang sitwasyon sa sulod sang patyo, bangud wala nagatinir ang iban nga mga persona nga nagasindi sang kandila sa palibot sini.
Suno kay Camacho, nagapatigayon sila sang pagmonitor sa palibot sang patyo agud masiguro nga wala sang indi maayo nga hitabo nga makadisturbo sa mga pumuluyo nga nagabisita sa lulubngan sang ila mga pinalangga.
Dugang pa sini, may mga barangay tanod nga nakadeploy sa palibot sang patyo agud magpatuman sang seguridad, magmonitor sa mga nagasulod kag nagaguwa, kag magbulig sa pagmintinar sang kalinong kag katawhay sa lugar.
Pahayag pa ni Camacho, daku ang ila pagpasalamat sa mga nagabulig nga awtoridad sa pagmintinar sang seguridad, ilabi na sa pagbinuligay sang nagkalain-lain nga sektor agud mangin hapsay ang pagduaw sang publiko sa ila mga himata nga nagtaliwan.
Ginalauman sang barangay nga magapabilin nga malinong kag organisado ang palibot sang patyo samtang nagapadayon ang pagbisita sang mga pumuluyo subong nga tigkalalag.
