Padayon ang pagmonitor sang mga katapo sang Federation of Roxas City Fire & Rescue Volunteers, Inc. sa Bato Public Cemetery sang Barangay Bato, Roxas City agud masiguro ang seguridad kag kaluwasan sang mga tawo nga nagabisita sa ila nagtaliwan nga mga pinalangga sini nga Undas 2026.
Sa interview sang Bombo Radyo kay Mr. Kenth Borro, Team Leader sang FEROCITY iya ginpahayag nga hugot ang ila pagmonitor sa sitwasyon sa sulod kag sa palibot sang sementeryo agud mapabilin ang katawhay kag malikawan ang anuman nga wala ginalauman nga insidente.
Gin-engganyo ang publiko nga magkooperar kag magsunod sa pagsulundan agud mangin matawhay kag luwas ang pagdumdom sang Tigkalalag.
Dugang pa, ang ila mga tinawo handa sa pagbulig sa mga tawo nga nagakinahanglan sang bulig samtang nagabisita sa ila mga pinalangga nga nagtaliwan.
