Magapabilin sa lima ka tuig ang termino sang mga barangay kag Sangguniang Kabataan (SK) officials matapos gin-affirm sang Korte Suprema (SC) ang constitutionality sang laye nga nagapalawig sang ila termino.
Ginbasura sang Korte Suprema ang petisyon nga ginpasaka ni election lawyer nga si Atty. Romulo Macalintal batok sa Republic Act No.12326, nga nag-amyenda sa anay apat ka tuig nga termino sang mga napilian nga barangay kag SK officials.
Sa desisyon nga ginsulat ni Associate Justice Rodil Zalameda, gin-athag sang Korte nga ang amo nga laye ang nagatalana sang kalawigon sang opisina sang mga opisyal kag wala lamang naga-isol sang eleksyon.
Bangud sini, ang masunod nga Barangay kag Sangguniang Kabataan Elections (BSKE) pagahiwaton sa Nobyembre 2028. Pagkatapos sini, ang masunod nga eleksyon pagahiwaton kada lima ka tuig.
Matandaan nga ginpirmahan ni President Ferdinand Marcos Jr. ang RA 12326 sang Setyembre 24, 2026. Sa idalum sang kasuguan, ang termino sang mga barangay kag SK officials ang ginbag-o halin sa apat ka tuig pakadto sa lima ka tuig rason nga ang eleksyon nga natalana sa Nobyembre 2026 ginsaylo sa Nobyembre 2028.
Wala naman ginpalampas ni Macalintal ang amo nga pagbag-o kag nag-file siya sang petisyon sa Korte Suprema agod kwestyunon ang legalidad sini.
Sa iya nga petisyon, iya ginkwestyon ang pagpalawig sang termino sang mga opisyal subong nga wala anay ginahiwat ang eleksyon, nga may kaangtanan sa kinamatarung sang mga pumuluyo sa pagpili sang ila barangay kag SK leaders.
Bisan pa sini, ginbasura sang Korte Suprema ang iya petisyon kag ibalin ang pagkavalid sang RA 12326.
