AGBUN-OD, Jamindan, Capiz – Arestado ang isa ka lalaki matapos ang pagserbi sa iya sang warrant of arrest sa Barangay Agbun-od, Jamindan, Capiz.
Matandaan nga madinalag-on nga na aresto ang suspek November 5 sa takna sang alas 5:50 sang aga may kaangtanan sa pagreklamo sa iya nga nagapinalupok ini sang armas.
Ang suspek amo si alyas Jojo, 47-anyos, mangunguma, residente sang nasambit nga lugar.
Sa interview sang Bombo Radyo kay Police Major Jaypee D Silvestre, Officer-in-Charge sang Jamindan Municipal Police Station, iya ginpahayag nga naglab-ot naman sa binulan ang surveillance sakay alyas Jojo kag bilang ebidensya nakuha sa iya puluy-an ang 38 caliber kag hand grenade, nga lunsay indi lisensyado kun sa diin ginpanginwala niya nga iya ang mga pagkabutang nga na rekober sa iya.
Suno kay Silvestre, duha ka kaso ang igapasaka sa suspek may kaangtanan sa Republic Act 10591 known as Comprehensive Firearms and Ammunition Regulation Act kag Republic Act 9516 may kaangtanan sa iligal nga pagpanagiya sa possession sang explosive device.
Pahayag pa niya base sa rekords sang suspek madamu na ang ga rekalamo sa iya indi lang sa subong nga tinuig sa nagligad man nga tinuig bangud sa masami ini nagapalupok sang armas, samtang base naman sa lugar ini ang klase sang lugar nga malayo kag taklaron.
Sa karon nahibaluan nga yara na sa kustodiya sang Jamindan PNP ang suspek para sa nagakaigo nga disposisyon.
